Tema 6: dossier

Tema 6: Programacións didácticas vixentes

Ola de novo!

Nesta nova entrada vou comentar as actividades que realizamos na aula que gardan relación co tema 6: as programacións didácticas vixentes, o cal tratei xusto na entrada anterior. As actividades son tres en total e puxéronse en práctica na seguinte orde: actividade piramidal, análise dunha programación didáctica coa elaboración dunha presentación e, por último, a análise e crítica dunha programación dunha EOI empregando screencast.

A actividade piramidal, xa realizada e comentada na entrada de dossier do tema 5, consiste nun debate entre o alumnado ao que se lle vai aumentando o número de participantes gradualmente. Primeiro debatemos por parellas sobre cales eran na nosa opinión as partes máis relevantes dunha programación didáctica. O meu compañeiro Juan e eu coincidimos en que as competencias, a metodoloxía, as actividades e a avaliación eran os compoñentes con maior importancia. Tras o debate coa parella do lado, a resposta seguiu sendo a mesma, pero cando eramos un grupo de 9 persoas fomos modificando algunhas das opcións. A resposta final foi a metodoloxía, a avaliación, as competencias básicas e os obxectivos.  Finalmente, entre toda a aula e coa axuda do profesor concluímos que aquelas partes de maior relevancia son nas que o profesorado pode intervir e modificar, non as que xa están establecidas polas institucións. É dicir, aquelas partes nas máis podamos aportar como docentes son nas que máis nos temos que centrar. En xeral creo que a actividade resultou útil para todo o grupo, xa que ninguén o enfocara dese xeito ao comezo, ademais volveu facer que reflexionaramos sobre un tema específico, que escoitaramos diferentes puntos de vista e que chegaramos a unha conclusión grupal. É un bo método para que participemos activamente na aula, para partillar ideas coas compañeiras/os e para adquirir nova información sen a necesidade de empregar outros recursos, tan só mediante o diálogo.

A segunda actividade foi moi completa e consta de varias partes. Para comezar tivemos que escoller neste páxina da xunta un centro educativo galego de ensino secundario, entrar na súa páxina web e procurar a programación didáctica dunha das linguas estranxeiras, o inglés no noso caso. O centro elixido polo meu grupo foi o Politécnico de Vigo. A continuación, o meu compañeiro e eu, tras botar unha ollada rápida ao documento, dispuxémonos a analizar que apartados estaban ausentes, como estaba estruturada a programación e que se podería mellorar dela, a medida que iamos atopando información relevante fomos creando con powtoon Un vídeo de presentación que recollía tódolos datos da análise realizada, estruturado do seguinte xeito:

- Apartados da programación

- Apartados dos que carece, como era o caso da concreción dos estándares de aprendizaxe, dos indicadores de logro para avaliar o proceso de ensino e a práctica docente e os mecanismos de revisión, avaliación e modificación das programacións didácticas en relación cos resultados acadados e os procesos de mellora.

- Descrición dos elementos que consideramos principais: o contexto,  os recursos e a metodoloxía.

- Aspectos destacables da programación, tanto positivos como negativos, por exemplo, os obxectivos estaban máis centrados en competencias sociais como a igualdade e a discriminación, e a existencia de estándares de aprendizaxe que non se avalían con ningún instrumento, pero que contan na cualificación.

Unha vez rematados os vídeos de presentación das programacións, estes foron reproducidos un por un mentres avaliabamos ao resto de grupos seguindo unha rúbrica. A avaliación fixémola por parellas, xuntamos todas as notas nun Excel, calculamos a media de cada grupo e, finalmente, deixamos un comentario en Youtube sobre a nosa opinión en tódolos vídeos.

Creo que a actividade tivo moi boa acollida, analizar criticamente a programación serviu para ter máis claro como ten que estar realizada, así mesmo, tamén foi boa idea que fósemos avaliadas/as e que puidésemos avaliar ás compañeiras e compañeiros seguindo unha rúbrica.

A terceira actividade consistiu noutra análise dunha programación didáctica baseándonos no artigo 49, o cal afirma que as programacións son o instrumento curricular específico para cada curso impartido nas Escolas Oficiais de Idiomas. No meu grupo, formado por cinco persoas, escollemos  a programación da materia de inglés da Escola Oficial de Idiomas de Monforte. Fomos comparando entre todas e todos o contido da programación co do artigo 49, anotamos aqueles aspectos máis importantes, fixemos unha segunda análise do documento máis detallada, aumentamos a información obtida con anterioridade, dividímola en cinco partes e, a continuación, empregamos screencast para a creación dun vídeo no que cada participante do grupo falaba sobre algún dos elementos da programación mentres a pantalla amosaba a páxina ou páxinas do documento que gardaban relación co que se dicía. Esta actividade resultou útil tanto para profundar nos contidos das programacións, como para aprender a usar unha nova aplicación e traballar en equipo.

Espero que vos animedes a usar algunha das aplicacións!

Un saúdo.